20240818 玫瑰節 Gala Wong, Loving Kindness of the Source 源慈念
啱啱星期日係梅村過玫瑰節
朝早起身發咗個夢
夢見借咗爸爸架車無牌駕駛
結果前面架車發生交通意外
我喺夢中第一個反應就係打俾爸爸
但望一望時間已經係凌晨1:45
又唔想影響爸爸休息所以決定都係唔打
夢醒時除咗因為交通意外心有餘悸
亦都留意到自己有幾信任父親嘅無條件支持
由細到大爸爸媽媽都用心照顧好我嘅一切
記得細個嗰時半夜起身嘔
佢同媽媽一聽到我嘅嘔吐聲都會衝出嚟睇我
有時夜晚發生咩事都好
當我一大叫爸爸或媽媽佢哋都會衝過嚟搵我
我知佢哋好愛我，甚至愛到有啲太肉緊
加上我係佢哋第一個女
第一次做人父母好困難，亦唔識點表達愛
所以喺我10歲到大學嗰段時間
同佢哋之間發生好多好多衝突
雙方都好難過痛苦
其實「討厭自己」一直係我嘅核心課題
可能因為同父母相處加上中學嘅精英主義環境
我一直覺得自己各方面都不被認可，自我價值感好低
呢份痛苦累積到大學時期終於爆發
我唔理解點解人會咁唔開心所以開始google search關於痛苦嘅事
亦因此接觸到佛學同身心靈
打開咗我人生修行嘅大門
呢八年以來經歷好多上上落落
一路行過嚟開始明白所有事情發生都係為咗令我哋更深入認識自己
有時我喺自己身上見到好多缺點
講某句難聽嘅說話有某啲負面想法
或者討厭別人身上某種特質
當我退後一步望自己就發覺我同父母好似好似
又有時我會好好欣賞自己
知道自己亦係一個好有愛嘅人
當我對其他人溫柔關心又會喺自己身上見到父母祖先
我越來越明白禪師成日講我地係父母、祖先、社會嘅延續
當我開始看見並接受我係佢哋嘅一部份
內心就會變得柔軟打開
漸漸看見苦樂相互依存嘅本質
擁抱生命呢份禮物
多謝父母一直嘅嘅同行
過去喺無明中我哋都為彼此造成好多痛苦
但我知道當我痛苦時你哋同樣痛苦
而呢份痛苦不知不覺間成為我哋嘅養分
帶領我哋更深入認識自己
亦多謝你哋俾我無私嘅慈愛滋養我成長
我知道我對世界嘅善良慈悲係從唔同人身上學習
第一個學習對象就係你地
最多謝你哋送俾我寶貴嘅生命
令我可以活著經歷一切
爸爸媽媽，多謝你地
呢幾年我哋關係都好咗好多
我知道我哋一直都一齊成長
好開心此生有你哋一齊同行
我承諾會繼續唔知醜咁表達我嘅愛
因為總有一日我哋都會經歷肉身分離
只要我哋知道彼此對對方嘅愛
呢份愛就能夠一直延續落去
咁就足夠了 唔會有任何遺憾
玫瑰節快樂☺️
/
「為讚頌對父母親的恩情，西方傳統會有「母親節」和「父親節」，梅村則有「玫瑰節」的傳統，是昔日老師一行禪師訪日後所創。身處東京之時，禪師曾遇過一些日本學生，把一朵康乃馨佩戴在僧袍上。在「母親節」當日，若母親在世，日本人有傳統把紅花戴在衣襟上；若母親已離世，他們則戴上白花。
越南及許多亞洲國家都會過「盂蘭節」，以紀念目犍連尊者救母的孝心。在梅村的傳承，我們每年會將「盂蘭節」及「玫瑰節」一同慶祝。這個機會，就是讓大家能為父母歷來的愛護、關懷而感恩、致敬。不論您的雙親在世與否，這都是一個特別的時刻，讓您能反思和感激父母—其美善的種子已傳給自己了。」